:
طالت الغيبه وانا احسبها سفر
واثر ذا الغيبه تبين لي غلاه
:
وصار فيها من الغبن موت وقهر
يا الله يا ربي تهون مبتلاه
:
اتذكر وش حصل عقب العصر
باقي (ن) بصمه ولا شي (ن) جلاه
:
افجعوني يا عضيدي بالخبر
والحزن ينهش بقلبي ثم كلاه
:
آه وقلبي على اخوي انفطر
وانتثر دمعي على خدي وملاه
:
يومهم صلوا عليه بعد الفجر
شفت ناس كثير تبكي من غلاه
:
في الكفن لفوه وهذا هو القدر
وبالنعش شالوه واصبح في علاه
:
وفي أراضي العود حطوا له قبر
اشهد انه راح وقلبي قد ولاه
:
فرشوه تراب وفوقه استقر
اللبن والطين من بعد الصلاة
:
ورشوا ترابه بدمعي والعطر
وقمت اجر الصوت وقلبي ما سلاه
:
من رحيله شفت انا موت (ن) حمر
وصرت وحدي عايشة والله بلاه
:
لو يغيب ويحتجب مد البصر
ما اقصرت عنه البصيرة من غلاه
:
اتعزى فيه وقلبي له يجر
ونة (ن) من قوها هزت فلاه
:
البصر لو راح ما فاد العمر
كالنجم من غير قمرا في خلاه
:
يا ألهي سألك يوم الحشر
تجعل بيمناه كتاب (ن) قد تلاه
:
ونجتمع وياه في دار المقر
دار ما عين (ن) رأت مثله حلاه