الرئيسية
ابكيتني ياعل وقتك يبكيك
وتبكي عيونك مثل مابكيت عيني
جرحتني لكن عسا الوقت يشقيك
وتشبع بوقتك ياعساها تشيني
ما كنت احسبنك على كثر ماغليك
تذبح خفوقي وتدفنه في سنيني
مدري من اللي بعتني لجل يعطيك
عطاك عمره؟ مثل ماصار فيني!
ما ضن به كثري من الناس يغليك
اموت هم إن شفت طرفك حزيني
واقوم الدنيا على شاان ارضيك
وان شفت ضحكك فرحتي تحتويني
وبكل بساطه جيت حضرة معاليك
جزا غلاي بخنجرك تطعنيني
أبكيتني لكن عسا الوقت يبكيك
وتبكي عيونك مثل مابكيت عيني
وعسا الجروح اللي من الغدر تلفيك
ويصير همك في خفوقك دفيني
وعسا منامك من عيونك يجافيك
وعساك في عمرك ووقتك حزيني
استغفرالله . . ما أبي شي يشقيك
الذنب ذنبي واستحق مايجيني
مادام به غيري من الناس مرضيك
ليه ارتجيك وخاطرك مايبيني
رح قد ما تقدر عسا الرب يحميك
وأنا لي جروحي عسا لله يعيني
